त्रिमूर्ती विद्यालयात विद्युत सुरक्षा व हरित ऊर्जेबाबत मार्गदर्शन
विद्यार्थ्यांना विद्युत उपकरणांच्या सुरक्षित वापराबाबत सूचना; वीजबचत व सौरऊर्जेचे महत्त्व पटवून दिले
घोगरगाव | शिव वार्ता प्रतिनिधी
महाराष्ट्र राज्य वीज वितरण कंपनीच्या वतीने‘ऊर्जाबचत, हरित ऊर्जा व विद्युत सुरक्षा’ या विषयावर जनजागृतीपर मार्गदर्शन कार्यक्रम त्रिमूर्ती माध्यमिक व उच्च माध्यमिक विद्यालय, घोगरगाव येथे आयोजित करण्यात आला.
यावेळी महावितरणचे सहाय्यक अभियंता सुरेश पासवान यांनी विद्यार्थ्यांना विद्युत उपकरणे सुरक्षितपणे हाताळण्याबाबत मार्गदर्शन केले. ओल्या हाताने विद्युत उपकरणांना हात लावू नये, खराब किंवा तुटलेल्या विद्युत तारांचा वापर करू नये, एका सॉकेटमध्ये अनेक उपकरणे जोडू नयेत, तसेच उपकरणांचा वापर झाल्यानंतर स्विच बंद करावा, अशा महत्त्वपूर्ण सूचना त्यांनी दिल्या.
विद्युत बिघाड झाल्यास स्वतः दुरुस्ती करण्याचा प्रयत्न न करता शिक्षक किंवा प्रशिक्षित इलेक्ट्रिशियनची मदत घ्यावी. विद्युत अपघात घडल्यास तातडीने वीजपुरवठा बंद करून मोठ्यांची मदत घ्यावी, तसेच शाळेत एमसीबी व अर्थिंगची योग्य व्यवस्था असणे आवश्यक असल्याचेही विद्यार्थ्यांना सांगण्यात आले.
यावेळी वीजबचत, सौरऊर्जेचा वापर आणि पर्यावरणपूरक हरित ऊर्जेचे महत्त्व विद्यार्थ्यांना समजावून सांगण्यात आले. विद्यार्थ्यांनी उत्स्फूर्त सहभाग घेत विद्युत सुरक्षेबाबत विविध प्रश्न विचारले.
या कार्यक्रमास देविदास पाटील चिंधे (लाईनमन), कैलास घोळवे (सिनियर टेक्निशियन), आकाश पठारे (वायरमन) व अविनाश रणनवरे (वायरमन) उपस्थित होते. उपस्थित मान्यवरांचा प्राचार्य संतोष जावळे सर यांच्या हस्ते सत्कार करण्यात आला.
यावेळी कार्यक्रमाचे प्रास्ताविक हरिश्चंद्र डिके यांनी केले. ‘वीज सुरक्षितपणे वापरा, ऊर्जा वाचवा आणि पर्यावरणाचे रक्षण करा’ हा संदेश या कार्यक्रमातून विद्यार्थ्यांपर्यंत पोहोचविण्यात आला.
बातमी : बापूसाहेब नवले | शिव वार्ताशिव वार्ता –
Author: Shiv Varta
*शिववार्ता (ShivVarta Marathi)* *शिववार्ता मराठी* हे महाराष्ट्रातील ताज्या, विश्वासार्ह, निष्पक्ष आणि जनहिताच्या बातम्या वाचकांपर्यंत वेगाने पोहोचवणारे डिजिटल वृत्तमाध्यम आहे. *शिववार्ता – सत्य, वेग आणि विश्वासाची ओळख.*
