टाकळीभान टेलटँक तुडुंब भरले; शेतकऱ्यांच्या चेहऱ्यावर फुलले हसू
शिव वार्ता प्रतिनिधी : रामेश्वर आरगडे
श्रीरामपूर तालुक्यातील टाकळीभानसह परिसरातील गावांसाठी वरदान ठरलेला टाकळीभान टेलटँक (गोविंदसागर) पूर्ण क्षमतेने भरून तुडुंब झाला आहे. टेलटँक ओव्हरफ्लो झाल्याने परिसरातील ग्रामस्थ आणि शेतकरी वर्गात आनंदाचे वातावरण निर्माण झाले असून, रब्बी हंगामातील पिकांच्या नियोजनाला मोठी चालना मिळणार आहे.
गेल्या वर्षी १ सप्टेंबर रोजी टाकळीभान टेलटँक पूर्ण क्षमतेने भरला होता. त्यावेळी सांडव्यातून वाहणाऱ्या पाण्याने पाझर तलावाकडे झेप घेतली होती. यंदाही धरण क्षेत्रात झालेल्या जोरदार पावसामुळे भंडारदरा आणि निळवंडे धरणे तुडुंब भरली. त्यामुळे प्रवरा नदीच्या पात्रात ओव्हरफ्लोचे पाणी सोडण्यात आले. या अतिरिक्त पाण्याचा लाभ टाकळीभान टेलटँकलाही मिळाला आहे.
१९७२ च्या दुष्काळानंतर झाली टेलटँकची निर्मिती
सन १९७२ च्या भीषण दुष्काळाच्या पार्श्वभूमीवर तत्कालीन कृषिमंत्री दिवंगत गोविंदराव आदिक यांच्या प्रयत्नातून टाकळीभान टेलटँकची निर्मिती करण्यात आली. या टेलटँकला स्वतःचा पाण्याचा स्रोत नसल्याने भंडारदरा धरणाच्या ओव्हरफ्लोच्या पाण्यातून कालव्याद्वारे तो भरण्याची व्यवस्था करण्यात आली आहे.
टेलटँकला सिंचनासाठी स्वतंत्र कालवा असून, या कालव्याच्या माध्यमातून टाकळीभान परिसरातील काही भागासह घोगरगावमधील काही भागातील शेती सिंचनाखाली आली आहे. त्यामुळे टेलटँकचा परिसरातील शेती आणि शेतकऱ्यांसाठी मोठा आधार निर्माण झाला आहे.
१९७ दशलक्ष घनफुट साठवण क्षमता
टाकळीभान टेलटँकची साठवण क्षमता तब्बल १९७ दशलक्ष घनफुट आहे. टेलटँकमधून होणाऱ्या पाझरामुळे टाकळीभानसह परिसरातील सुमारे सात ते आठ गावांमधील शेतीला मोठा फायदा होतो. या पाझरामुळे परिसरातील विहिरी आणि भूजलपातळीलाही आधार मिळत असल्याने शेती हिरवीगार होण्यास मदत होते.
याशिवाय टेलटँक परिसरात टाकळीभानसह आसपासच्या सात ते आठ गावांच्या पाणीपुरवठा योजना कार्यरत आहेत. त्यामुळे टेलटँकमधील पाणीसाठ्याकडे परिसरातील ग्रामस्थांचे आणि शेतकऱ्यांचे नेहमीच लक्ष असते.
जलसंपदा विभागाच्या प्रयत्नांना यश
धरण क्षेत्रात झालेल्या दमदार पावसामुळे भंडारदरा व निळवंडे धरणे भरल्यानंतर ओव्हरफ्लोचे पाणी प्रवरा नदीपात्रात सोडण्यात आले. त्यानंतर जलसंपदा विभागाने हे पाणी योग्य पद्धतीने टेलटँकपर्यंत पोहोचविण्यासाठी नियोजन केले.
जलसंपदा विभागाचे कार्यकारी अभियंता स्वप्निल काळे यांच्या मार्गदर्शनाखाली तसेच वडाळा उपविभागाचे उपकार्यकारी अभियंता संजय कल्हापुरे यांच्या आदेशानुसार प्रवरा डाव्या कालव्यातून थेट टाकळीभान टेलटँकमध्ये ओव्हरफ्लोचे पाणी सोडण्यात आले.
गेल्या पंधरा ते वीस दिवसांपासून जलसंपदा विभागाच्या कर्मचाऱ्यांनी टेलटँक भरण्यासाठी सातत्याने प्रयत्न केले. बेलपिंपळगावचे शाखा अभियंता शंतनू मारवाडी, कालवा निरीक्षक अप्पासाहेब तनपुरे आणि मदतनीस विनोद साठे यांनी पाणी व्यवस्थापनासाठी विशेष परिश्रम घेतले.
रब्बी हंगामाचे नियोजन शक्य
अखेर रविवारी सायंकाळी टाकळीभान टेलटँक पूर्ण क्षमतेने भरून ओव्हरफ्लो झाला. त्यामुळे परिसरातील शेतकऱ्यांच्या चेहऱ्यावर समाधानाचे आणि आनंदाचे वातावरण पाहायला मिळाले. टेलटँकमध्ये मुबलक पाणीसाठा झाल्याने आता शेतकऱ्यांना रब्बी हंगामातील पिकांचे नियोजन अधिक आत्मविश्वासाने करता येणार आहे.
टेलटँक भरल्यामुळे आगामी काळात शेतीसाठी पाण्याची उपलब्धता वाढण्याबरोबरच परिसरातील भूजलपातळी टिकून राहण्यासही मदत होणार आहे. त्यामुळे टाकळीभानसह परिसरातील शेतकऱ्यांना यंदाच्या हंगामात मोठा दिलासा मिळाला आहे.
टेलटँक ओव्हरफ्लो झाल्याने परिसरातील शेतकऱ्यांनी जलसंपदा विभागाच्या अधिकारी व कर्मचाऱ्यांचे आभार मानले असून, पाण्याचे योग्य नियोजन करून टेलटँक भरून दिल्याबद्दल समाधान व्यक्त केले आहे
Author: Shiv Varta
*शिववार्ता (ShivVarta Marathi)* *शिववार्ता मराठी* हे महाराष्ट्रातील ताज्या, विश्वासार्ह, निष्पक्ष आणि जनहिताच्या बातम्या वाचकांपर्यंत वेगाने पोहोचवणारे डिजिटल वृत्तमाध्यम आहे. *शिववार्ता – सत्य, वेग आणि विश्वासाची ओळख.*
