पुण्यातील पत्रकार हल्ल्याचे श्रीरामपुरात पडसाद;

पुण्यातील पत्रकार हल्ल्याचे श्रीरामपुरात तीव्र पडसाद; आरोपींवर कठोर कारवाईची मागणी

निखिल सुक्रे यांच्यावरील हल्ल्याचा पत्रकार संघटनांकडून निषेध; अपर पोलीस अधीक्षक सोमनाथ वाकचौरे यांना निवेदन

श्रीरामपूर | शिव वार्ता प्रतिनिधी

पुणे येथील नवी पेठ परिसरात ‘जय महाराष्ट्र’ वृत्तवाहिनीचे पुणे प्रतिनिधी निखिल सुक्रे यांच्यावर झालेल्या हल्ल्याच्या घटनेचे पडसाद श्रीरामपुरात उमटले. या घटनेचा निषेध करत श्रीरामपूर मराठी पत्रकार संघ आणि डिजिटल मीडिया पत्रकार संघाच्या वतीने पत्रकारांवरील हल्ल्यांना आळा घालण्यासाठी संबंधित आरोपींवर पत्रकार संरक्षण कायद्यानुसार तातडीने कठोर कारवाई करावी, अशी मागणी करण्यात आली.

यासंदर्भात पत्रकार संघटनांच्या पदाधिकाऱ्यांनी श्रीरामपूरचे अपर पोलीस अधीक्षक सोमनाथ वाकचौरे यांची भेट घेऊन निवेदन सादर केले. श्रीरामपूर मराठी पत्रकार संघाचे संस्थापक अध्यक्ष प्रदीप आहेर यांच्या नेतृत्वाखाली हे निवेदन देण्यात आले.

मिळालेल्या माहितीनुसार, १ ऑक्टोबर रोजी पुण्यातील नवी पेठ परिसरात अखिल भारतीय विद्यार्थी परिषदेच्या वतीने स्पर्धा परीक्षांच्या प्रश्नांवर आंदोलन करण्यात येत होते. या आंदोलनादरम्यान आमदार रोहित पवार यांनी आंदोलनस्थळी भेट दिली. या घटनेचे वार्तांकन करण्यासाठी गेलेले पत्रकार निखिल सुक्रे यांच्यावर हल्ला झाल्याचा आरोप करण्यात आला आहे.

या प्रकरणात आमदार रोहित पवार यांच्या समर्थकाकडून हल्ला झाल्याचा आरोप करण्यात आला असला, तरी या आरोपांबाबत संबंधितांकडून अधिकृत भूमिका तसेच पोलिस तपासातील निष्कर्ष समोर येणे बाकी आहे. त्यामुळे प्रकरणाची निष्पक्ष चौकशी करून वस्तुस्थिती स्पष्ट करण्यात यावी, अशी मागणी पत्रकार संघटनांनी केली.

पत्रकारांवर कर्तव्य बजावत असताना होणारे हल्ले ही गंभीर बाब असून, अशा घटनांमुळे पत्रकारांच्या सुरक्षिततेचा प्रश्न पुन्हा ऐरणीवर आला आहे. पत्रकारांना कोणत्याही दबावाशिवाय निर्भयपणे वार्तांकन करता यावे, यासाठी प्रशासनाने पत्रकारांच्या सुरक्षेबाबत ठोस उपाययोजना कराव्यात, अशी भूमिका यावेळी मांडण्यात आली.

“पत्रकारांवरील हल्ला हा केवळ संबंधित पत्रकारावरील हल्ला नसून मुक्त पत्रकारितेच्या अधिकाराशी संबंधित गंभीर बाब आहे. हल्ला करणारा व्यक्ती कोणत्याही राजकीय किंवा सामाजिक गटाशी संबंधित असला, तरी तपासात दोष सिद्ध झाल्यास त्याच्यावर कायद्यानुसार कठोर कारवाई झाली पाहिजे,” अशी भूमिका पत्रकार संघटनांच्या पदाधिकाऱ्यांनी व्यक्त केली.

पत्रकारांच्या संरक्षणासाठी अस्तित्वात असलेल्या कायद्याची प्रभावी अंमलबजावणी करावी, पत्रकारांवरील हल्ल्यांच्या प्रकरणांचा तपास जलदगतीने करावा आणि भविष्यात अशा घटना घडू नयेत यासाठी प्रतिबंधात्मक उपाययोजना कराव्यात, अशी मागणी निवेदनाद्वारे करण्यात आली.

पत्रकार संघटनेचे पदाधिकारी उपस्थित

निवेदन देताना श्रीरामपूर मराठी पत्रकार संघाचे संस्थापक अध्यक्ष प्रदीप आहेर, उपाध्यक्ष महेश रक्ताटे, कार्याध्यक्ष ॲड. बाळासाहेब आगे, ज्येष्ठ पत्रकार नागेशभाई सावंत, सचिव सुरेश कंगुणे, संघटक जयेश सावंत, सुधीर लोळगे, अस्लम बिनसाद, इमरान शेख, इनायत अत्तार, अमोल साबणे, शोहेब शाह, राजेंद्र सूर्यवंशी यांच्यासह पत्रकार संघटनेचे पदाधिकारी व सदस्य उपस्थित होते.

पत्रकारांवरील हल्ल्यांच्या घटनांना आळा घालण्यासाठी पत्रकार संघटना एकजुटीने पाठपुरावा करणार असल्याचे यावेळी पदाधिकाऱ्यांनी सांगितले.

Author: Shiv Varta

*शिववार्ता (ShivVarta Marathi)* *शिववार्ता मराठी* हे महाराष्ट्रातील ताज्या, विश्वासार्ह, निष्पक्ष आणि जनहिताच्या बातम्या वाचकांपर्यंत वेगाने पोहोचवणारे डिजिटल वृत्तमाध्यम आहे. *शिववार्ता – सत्य, वेग आणि विश्वासाची ओळख.*